„ლოკომოტივი“ მარგვეთთან მატჩისთვის ემზადება

თბილისის „ლოკომოტივმა“ ბოლო ორ შეხვედრაში დამაჯერებელი გამარჯვება მოიპოვა და სატურნირო ცხრილში მდგომარეობა გაიუმჯობესა.

ჩვენმა გუნდმა გასვლით შეხვედრაში „ბეთლემი“ ანგარიშით 3:0 დაამარცხა. მეტოქის კარში გოლები დავით სამურკასოვმა, საბა კაკულიამ და იუსიბ მეხტიევმა გაიტანეს.

წინა ტურში სამი ქულა „ლოკომოტივმა“ საკუთარ მოედანზე მოიპოვა. ჩვენმა გუნდმა „გარდაბანს“ უმასპინძლა და კვლავ 3:0 გაიმარჯვა. შეხვედრაში თავი დაჩი გოგოლმა, საბა კაკულიამ და ბექა ბურდიაშვილმა გამოიჩინეს.

მოპოვებული გამარჯვებების შემდეგ „ლოკომოტივი“ 37 ქულითა და 10 მოგებით სატურნირო ცხრილის მე-8 პოზიციაზე იმყოფება.

მომდევნო შეხვედრას ლოკო 7 ნოემბერს, სტუმრად, „მარგვეთის“ წინააღმდეგ გამართავს. მატჩი ზესტაფონში, დავით აბაშიძის სახელობის სტადიონზე, 15:00 საათზე დაიწყება.